فتـّحت عيني رضيع
على سقف "ستة اكتوبر"
على سقف "ستة اكتوبر"
من ماية الشتا
الكوبري ده غطاني
وبـَلِف أبيع مناديل
أو ف السبيل .. عابر
ولما آآآجي أرّوح
رصيفه عنواني
سمّونا .. ولاد شوارع
يبقى الشارع أبونا ؟!
قالوا ده شارع الحكومة
قلنا ... دي مِـراة أبونا .
الليلة كنت جعان
جانا ضيوف كتير
باتوا معانا ف الميدان
جايبين معاهم خير
كانوا بيهتفوا : حُـرية
عايزين كرامة وعدل
صَـبـَحنا صحاب قوام
وعرفت معنى الأهل
و ف ليلة زي العيد
طرَح الميدان زغاريط
قالوا مُـنانا اتحقق
أُس الفساد .. غار
نِـزلتْ من عيني دمعة
هتمشوا وتسيبونا ؟!
ده احنا عِشرة ميدان
يا معشر الثوار
فرحان أنا ليكوا
فرحان أنا بيكوا
بس أمانة عليكوا
ابقوا تعالوا زوروني
واوعوا ف يوم تنسوني
ده حلمكوا اتحقق
يمكن .. عشان أنا فيكوا
